IBC 13

Ang IBC 13 ay isa sa tatlong mga himpilan na pag-aari ng gobyerno. Ang IBC ay tumatayo para sa Intercontinental Broadcasting Corporation. Ito ay nagsasahimpapawid ng libre sa TV channel 13 sa very high frequency (VHF). Ito ay korporasyon na pag-aari at kontrolado ng gobyerno na kasalukuyang sumasailalim sa proseso ng pagsasapribado. Ang himpilan ay kasalukuyang nagsasahimpapawid ng kawili-wiling timpla ng mga palabas tulad ng home shopping, sabong, at pang relihiyon na programa. Ang istasyon ay may 0.15 porsiyentong audience share batay sa National Urban TV Audience Measurement ng Nielsen mula Enero hanggang Agosto 2016.Iba't ibang relihiyon ang nagsasahimpapawid ng kanilang mga programa sa IBC. Ito ang mga Pentecostal Missionary Church of Christ (4th Watch), ang Kerygma TV ng Katolikong simbahan at El Shaddai, ang Katolikong charismatic group na pinangungunahan ng maimpluwensiyang si Mariano “Mike” Velarde. Ang IBC 13 ay nag umpisa noong 1960 bilang Inter-Island Broadcasting Corporation na pag-aari ng noo’y may-ari ng San Miguel Corporation na si Andres Soriano Sr.. Ang kilalang crony ni dating Pangulong Ferdinand E. Marcos, si Roberto Benedicto ang nakakuha ng istasyon noong kinalaunan.Matapos ang 1986 People Power Revolution, inilit ng gobyerno sa pamamagitan ng Presidential Commission on Good Government (PCGG) ang istasyon bilang bahagi ng pagbawi sa nakaw na yaman ng mga Marcos. Bagaman pag-aari pa rin ng gobyerno ang IBC, ang himpilan ay tumatakbo na parang pribadong korporasyon; hindi ito kumukuha ng pinansiyal na suporta mula sa gobyerno at umaasa sa kita ng istasyon para sa sariling operasyon. Noong 2010, ang network ay pumasok sa isang P780-milyong joint venture kasama ang Prime Realty, na may kaugnayan sa R-II Builders Group ni Reghis Romero Jr. para sa pag debelop ng Broadcast City, kung saan naroon ang RPN at IBC, bilang proyekto ng real estate sa Quezon City. Ilang mga senador ang nagkuwestiyon sa kontrata dahil nakasasama ito sa gobyerno. Ang pagsasapribado ng himpilan ay gagawin sa pamamagitan ng public bidding. Ang tinatayang pinakamababang halaga ng mga bid ay P1.977 bilyon.Sa isang pahayag kamakailan, sinabi ng administrasyong Duterte na plano nitong ibenta ang istasyon sa halagang P10 bilyon.