Kumakaunti ang nagbabasa ng diyaryo

Diyaryo ang pinakatinamaan ngayong panahon ng internet. Marami ang nagbabasa ng diyaryo bago nauso ang social media at dumali ang pagkuha ng impormasyon online. Ang mga nangungunang diyaryo—tabloid man o broadsheet—ay kadalasang may dalawang imprenta: ang una ay para sa mas maagang pagpapadala sa mga probinsiyang sakop ang karamihan ng bansa. 

Noong 2019, sa bawat 100 tao, ang nagbabasa ng diyaryo sa mga lungsod ay dalawa o tatlo lang, habang lima o anim naman sa mga probinsiya.  

Ilan pang dahilan ng pagkaunti ng mga nagbabasa ng diyaryo: 

• tumaas ang presyo
• lumiit ang mga pahina 
• kumaunti ang mga nagtitinda sa bangketa 
• wala nang mga naglalako sa mga bahay-bahay

Lalo pang pinalala ng pandemya ang pagkaunti ng mga nagbabasa ng diyaryo. Dahil limitado ang paglabas noong 2020, social media at iba pang online sources ang naging pangunahing pinagkukunan ng balita at impormasyon. Naging limitado rin ang pagpapalabas ng mga estasyon ng TV at radyo, at karamihan sa mga network ay lumipat online. 

Ang paglipat ng mga tao online para sa balita at impormasyon ang pinakanagpabagsak sa diyaryo. Kahit ang mga nagungunang publisher na kayang ituloy ang paglilimbag ng mga diyaryo ay tinaggap na ang katotohanang, kung gusto nilang kumita, kailangan nilang lumipat online dahil naroon ang mga customer. 

Ang matatagal nang publisher (Manila Bulletin, Philippine Daily Inquirer, at The Philippine Star) na lang ang patuloy na naglilimbag ng mga diyaryo. Pero kahit sila ay may iba pang mga negosyo para matustusan ang media outlets nila na manguna pa rin sa pagkakaroon ng pinakamaraming mambabasa. 

Tingnan sa baba ang pagkokompara ng mga nangungunang diyaryo sa Pilipinas noong 2016 at mga may-ari ng media sa Pilipinas noong 2023: